Постојаниот пораст на турист од Русија, според предвидувањата и анализите на Грчката асоцијација на туристички компании ќе кулминира оваа сезона, кога Русите се очекуваат во импресивна бројка која ќе изнесува повеќе од еден милион гости.
Привлечени од природните убавини, атрактивните сместувачки капацитети, забавата, но и од православните верски објекти, Русите се повеќе се одлучуваат својот годишен одмор да го поминат токму во Грција, за сметка на традиционалните одредишта како Шпанија и Франција.
Големата маркетинг кампања за летување во Грција спроведена од Грчкото национално туристичко биро која на глобално ниво изнесува нешто повеќе од 30 милиони евра, но и визните олеснувања (од минатата година Русите добиваат виза со мулти влезови) несомнено резултираа со освојување на овој огромен пазар, кој со својот завиден потенцијал ќе придонесе за зголемен профит.
Австријците бараат поевтини хотелски услуги
Сепак и покрај најавите за зголем број на туристи од Русија, грчкиот туризам се соочува со одредени порблеми, пред се поради високите цени на хотелските услуги. Австриските туристички организации ги повикаа грчките хотелиери да ги намалат цените со цел да ги вратат австриските туристи кои се повеќе ги откажуваат аранжманите за летните одмори во Грција.

Според коментарите од претставниците на најголемите туристички агенции во Австрија , оваа година бројот на резервации на Австријците што сакаат да летуваат во Грција досега се намалил за 20 отсто, во споредба со овој период минатата година. Цените на грчките хотели мора да бидат поатрактивни, односно да поевтинат, велат австриските туристички агенции.
Бројката на австриски државјани кои летувале во Грција минатата година изнесувала 480.000, за 120 илјади помалку од претходните години. Во 2007 година оваа бројка изнесувала и над 600.000 (најголема бројка во историјата). Ова е доказ дека Грција го губи туристичкиот пазар во борбата со Шпанија, Португалија, Турција и Германија.
Сепак има одредени показатели, велат европските туристички агенции дека бројката на туристи за Грција ќе се зголеми во наредните месеци, бидејќи сега излегуваат програмите и аранжманите за летување во Грција, а неколку ниско буџетни авиокомпании најавија зголемување на бројот на евтини летови кон Грција. Неодамна Lauda Air ги зголеми неделните летови кон 19 дестинации во Грција. Порано имаше 58 летови неделно, сега има 63 летови. Исто и компанијата Fly Niki ги зголеми летовите од 40 неделно, на 42 лета неделно од Австрија кон Грција.
Иако туризмот во Грција бил развиен уште во антички времиња, најголем раст и процут доживува во 1960-тите и 1970-тите години од минатиот век. Тогаш се изградени многубројни хотелски капацитети, апартмани и други објекти, со што бројката на туристи почнува да се зголемува вртоглаво. За пораст на туризмот придонесе и Летната Олимпијада во 2004 година како и песната на Евровизија што се одржа во 2006 година во Атина.
Минатата година и покрај глобалната економска криза, Грција според информациите на Грчкото национално туристичко биро ја посетиле повеќе од 16.5 милиони туристи. Профитот во 2011 во однос на 2010 година, бил зголемен за десет проценти, тренд кој се надеваат дека ќе продолжи и оваа година.
www.visitgreece.gr
www.greekisland.co.uk
www.facebook.com/UPGreekTourism